首頁 » » 政Whats噏:泛民區選玩空降 尹兆堅撼陳恆鑌

政Whats噏:泛民區選玩空降 尹兆堅撼陳恆鑌

作者:h 發表日期:h 分類:

民主派姚松炎爆冷喺上月立法會九龍西補選落敗,泛民密謀翻身,明年區議會選舉將會係試金石。據政界流傳泛民區選協調名單,以民主黨(白鴿黨)最重錘出擊,立法會議員尹兆堅將空降荃灣楊屋道選區,硬撼自2003年喺該區當選嘅民建聯陳恆鑌,而兩名白鴿黨前副主席單仲偕同蔡耀昌喺離島「復出」,其中單仲偕有意取回已退黨嘅郭平喺逸東邨南嘅根據地,至於蔡耀昌則有意喺東涌南選區挑戰民建聯「雙料議員」周浩鼎,阻止對方再循俗稱「超級區議會」嘅區議會(第二)功能界別議席進身立法會。不過,正所謂「氹仔浸蛟龍」,有知名度嘅泛民空降區選,唔單止冇保證,隨時輸到一仆一碌。

距離區議會換屆選舉只有年半時間,建制同泛民均加緊各自協調嘅工夫,首先曝光嘅係泛民區選協調名單,白鴿黨現時5名「雙料議員」,包括胡志偉、涂謹申、鄺俊宇、林卓廷同許智峯料會喺原區角逐連任。

最令人意想唔到嘅係3年前喺葵青石蔭選區,以50多票之差落敗嘅尹兆堅,有意轉區空降荃灣楊屋道選區硬撼同為立法會議員嘅陳恆鑌,換言之,尹陳二人只有勝出一方先會係「雙料議員」。仲記得尹陳二人早年因選民登記投訴機制,同場或隔空多次唇槍舌劍,今次選戰真係新仇舊恨一次清。

協調名單另一個特色,就係泛民多名老將「復出」或捲土重來參選,最引人注目係「老鴿」、立法會前議員單仲偕,佢自從前年立法會換屆選舉於港島區排第二,力撐排第一嘅許智峯當選,其後未有新動向,有傳佢落戶離島逸東邨南,取回長年由白鴿黨勝出嘅老巢。至於公民黨嘅立法會前議員陳家洛,據報喺泛民協調後獲得優先權,有望第二度參選南區海怡東選區。

至於九西補選意外輸咗畀建制派鄭泳舜嘅建築、測量、都市規劃及園境界前議員姚松炎,政界早前有傳姚或落戶深水埗南昌北,喺區選再同鄭一決高下,但據稱姚松炎未表態去向,經協調後暫時優先喺3年前落敗嘅南區置富選區捲土重來,最終其實係咪聲東擊西,相信泛民同道人都好想知道答案。

講到底,市民對於區議會選舉參選人嘅要求「貼地」好多,若然有人妄想以知名度或政治效應空降上陣,就可以取代傳統地區「揼石仔」工作,此舉唔單止昧於形勢,形同自掘墳墓,睇怕最終只會賠了夫人又折兵。


本文來源:http://hk.on.cc/hk/bkn/cnt/news/20180420/bkn-20180420020018594-0420_00822_001.html

Tag:
本文鏈接:http://www.packagehk.com/108594.html