首頁 » » 政Whats噏:陳肇始甩底區議會 被鬧冇口齒

政Whats噏:陳肇始甩底區議會 被鬧冇口齒

作者:Ivy 發表日期:05 分類:

黃大仙區議會原定今日(23日)與食物及衞生局局長陳肇始會面,表達不滿聖母醫院重建後仍未能提供急症室等服務的多項訴求,但陳肇始喺會面開始前約半小時臨時「甩底」,由副局長徐德義頂上出席。黃大仙區議員與多個團體共數十名代表,批評陳肇始「冇口齒」及唔尊重區議會,佢哋又向徐德義遞交請願信,而全體區議員更喺會面時集體離場抗議。

黃大仙區議員簡志豪表示,約一星期前獲告知陳肇始將會出席會面,但開會之前才知道陳肇始因公務未能出席,覺得唔能夠接受,因為局長應該把握機會聽地區意見。區議會喺今年1月曾經得到各黨派一致通過動議,要求聖母醫院重建並增加更多病床以及提供急症室或24小時急診服務等,現時嘅方案與區議會嘅要求相距甚遠,當局更打算與其他數間醫院綑綁一同提交上立法會審議,佢哋擔心隨時影響黃大仙居民嘅利益。

徐德義就指,陳肇始因特別嘅事而未能出席會議,食衞局係一個團隊,所以由佢代表局方與區議會會面。徐指,當局聽到區內聲音,聖母醫院擴建工程與其他醫院工程綑綁提交上工務小組,係希望增加效率,而聖母醫院日後將會提供40張住院病床及16張日間病床,空間及設施方面都會有改善,加上啟德急症醫院將會提供急症服務,相信能夠應付附近居民需要,而佢並冇承諾聖母醫院方案能夠作出調整。


本文來源:http://hk.on.cc/hk/bkn/cnt/news/20180423/bkn-20180423181937679-0423_00822_001.html

Tag:
本文鏈接:http://www.packagehk.com/111105.html