首頁 » » 雙線Dress Code 恭迎紅軍訪港

雙線Dress Code 恭迎紅軍訪港

作者:Jacqueline 發表日期:07 分類:

利物浦訪港在即,各位紅軍粉絲準備好接駕未?接駕要做啲乜?除咗打探佢哋嘅每日行程(呢方面就交畀我哋嘅體育組同事,大家要密切留意on.cc嘅「波經」報道了),仲要有合適嘅Dress Code,兜咁大個圈,無非想提你,2017/18嘅紅軍新戰衣已經公諸於世!

先講主場版本,今年正係利物浦125周年,新波衫嘅多項設計都向歷史取經,致敬色彩相當濃厚。首先喺顏色方面,紅色當然唔改得,不過色調上似乎深咗少少,原來參考咗50多年前嘅紅軍波衫,當時正係傳奇領隊辛奇利(Bill Shankly)帶隊,贏過三次本土頂級聯賽、兩次足總盃及一次歐洲足協盃(歐霸前身)冠軍。除此之外,領位採用V領剪裁,而V領與袖口都係白色為主,加上紅間點綴,如此設計,與1982至84年嘅款式相似,當時紅軍連贏兩屆本土頂級聯賽冠軍外,仲贏埋84年嘅歐洲冠軍球會盃(歐聯前身);新波衫唔只有呢啲經典設計,Liver Bird會徽仲加入咗「1892」、「2017」與「125 Years」等字樣,除咗同球迷甜思思想當年之餘,亦都鼓勵球會上下喺新球季再寫輝煌史。

至於同步發表嘅新作客波衫,就有更隆重嘅歷史意義,設計靈感正正係1892年創會時嘅四格雙色組合,其後多款利物浦作客波衫,都沿自呢款Pattern變化而成,最深入民心嘅當然係1991至93,以及95至96年間嘅作客波衫,唔只圖案配搭,就連當時嘅綠白雙色,都喺2017/18嘅新波衫上重現,不同之處係綠色位置由實色變成直間,而領位、會徽、NB標誌與心口贊助商圖案就用黑色表達。

來港參加英超亞洲盃嘅仲有李斯特城,佢哋亦都公布咗新主場波衫,上一季嘅波衫沿用寶藍色,特別之處係膊頭至衫袖縫上一對金線點綴,新波衫就以呢個款式為基礎,明顯變化在於金線變成粗間,中間就有PUMA嘅豹形商標,而衫袖底部多咗一片金色橫幅點綴。據聞呢款新衫有望下周抵港,屆時係9號嘅「Vardy」,還是20號嘅「Okazaki」嘅熨字,邊款係最多球迷選擇呢?


本文来源:http://hk.on.cc/hk/bkn/cnt/lifestyle/20170713/bkn-20170713150030550-0713_00982_001.html

Tag:
本文鏈接:http://www.packagehk.com/18913.html