首頁 » » 歐聯 紙板門將水準之作 紅軍又贏唔到

歐聯 紙板門將水準之作 紅軍又贏唔到

作者:Ailsa 發表日期:2017-09-27 07:02:01 分類:

即上英超刨績王:http://win.on.cc/epl 

又一場典型利物浦賽事:控球多、射門多、攻勢多,但因為後防問題,再一次應贏而贏唔到。歐聯分組賽E組賽事,紅軍遠征俄羅斯鬥莫斯科斯巴達,無論實力、名氣、速度、體力都在對手之上,但沙迪奧文尼、羅拔圖法明奴、穆罕默德沙拿及後備史杜列治不斷浪費入球機會,反而對手憑一個罰球一射就入,雖然呢個波球速頗快,但角度不算刁鑽,靚仔門神卡利奧斯救唔到要負上責任。菲臘比古天奴建功扳平下,紅軍只能失望地打成1:1平手。

紅軍去到俄羅斯鬥莫斯科斯巴達,上半場已有大把入波機會,17分鐘沙迪奧文尼左路一斬,法明奴近門一頂過唔到對方門將。23分鐘主隊取得禁區頂罰球,費蘭度一射毫無角度,但今仗代替米洛列特打正選嘅卡利奧斯一樣救唔到,主隊第一個埋門就搞掂領先。其後文尼食詐胡,之後扣中路施射都搞唔掂。31分鐘,文尼同古天奴做個靚One-two,後者勁抽入網追成1:1平手,完半場前費明奴門前又失機。

換邊後利物浦繼續圍攻對手,53分鐘古天奴左路罰球起右腳勁射近柱,又被主隊門將列保夫救到。其後紅軍沙拿同阿歷山大阿諾先後埋門都失機。領隊高普換走沙迪奧文尼換入史杜列治,呢位於上仗英超贏李斯特城表現出色嘅前鋒,今場就令人失望,三次對面龍門,2球抽射出界,1球空晒都窩利打飛機,到補時6分鐘,阿諾右路傳中,沙拿近門一頂又被神救,紅軍全場17次攻門只入1球,繼首仗對西維爾失分之後,今仗又贏唔到,2場歐聯分組賽得2分。另一邊廂西維爾3:0大破馬里博爾,以4分排榜首。

東網體育同你追實體壇每個精彩時刻!
http://bit.ly/2ecTF2A 


本文来源:http://hk.on.cc/hk/bkn/cnt/sport/20170927/bkn-20170927044208195-0927_00882_001.html

Tag:
本文鏈接:http://www.packagehk.com/28078.html