首頁 » » 【港超專版】香港飛馬訓導主任文彼得

【港超專版】香港飛馬訓導主任文彼得

作者:Cheryl 發表日期:10 分類:

每支成功的球隊,陣中總少不了負責「Dirty work」的球員,球員年代的文彼得(Peter)在場上一向「死纏爛打」,可說是當中的佼佼者。現時身為香港飛馬領隊,Peter一樣甘心在球會負責這種不討好的工作,執着於球員的每個細微位,全因他相信態度決定一切,期望年輕球員終有一日可以成長,從球員變做球星,難怪他表示:「我嘅角色就好似一個訓導主任!」

圖/文:袁志浩(部分相片由受訪者提供)

由球員轉型成為領隊,「文總」並非只翹起雙手在場邊觀看操練,訪問當日他於九龍仔公園球場滿場飛,與球員踢練習賽,邊踢邊提醒隊友;休息時間亦不放過,喝了幾口水後便捉住球員指手畫腳,矯正起腳姿勢。坊間總是說「認真你便輸了」,但「文總」卻堅持對球員嚴謹,反而相信執着才是致勝之道:「好波之餘紀律都好緊要,球場內好細微嘅事都要認真,如果球員訓練唔認真,咁佢比賽就唔會踢得好。我做球員時都有呢種執着,所以依家教佢哋都係咁。一個控球、傳球,一有失誤我就會出聲,同佢講點樣做得更好,唔可以畀佢有惰性,不斷提醒,令佢好自然有潛意識去做好。」

「球員定球星睇你付出幾多」

場外Peter與球員分屬好友,場內卻要收起笑容做「衰人」,但他亦毫無怨言:「其實有時都會同佢哋有拗撬,不過我覺得球隊入面就係要有Dirty work嘅角色,有啲嘢一定要揸番正,球員有佢想要嘅嘢,但球會立場唔係你想有就有,要攞到球會同球員間嘅平衡,我嘅角色就好似訓導主任咁!」

成為球星是每名職業球員的夢想,Peter認為兩者分別在於心態外,訓練量亦是重要一環,年輕球員要追夢就要敢於付出:「你想做球員,咪付出番做球員嘅代價,如果想成為球星,代價一定比球員多。球員練傳波可能只係一日100下,但球星可能係3,000下,分別係你點樣付出,你就攞番啲咩,足球就係咁簡單。機會係留畀有準備嘅人,你永遠都唔裝備自己,機會嚟你都唔會把握得到。」Peter笑言自己當年亦只是個「球員」,不過就指現時隊中巴西外援利馬,無論心態及腳法都達球星級,他亦認為副隊長黃俊皓只要再拿捏好位置感,看好他成為下一個文彼得。

「振興球市?搵港超教練落區教」

經歷過本地波冰河時期,亦有幸參與2009年南華亞協盃4強坐爆大球場一役,要球市回復昔日光輝,Peter亦有個人建議及看法:「我好記得前隊友李海強講過點解佢咁好波,係因為佢8、9歲喺廣東隊時,一日就有11課練習,有好嘅練習,技術自然比人好。我認為可以搵多啲港超或甲組球會嘅教練落區去教波,令每一區嘅年輕小將有穩定嘅練習機會,球會亦要同政府多啲合作,多啲注重青訓,球壇先有希望。」


10.26大婚甜言冧完美女友

擁有俊朗外表的Peter,周四(26日)就會正式同未婚妻Alice拉埋天窗,日前他在社交網站笑言,對於快被「私有化」感到緊張。Peter透露婚禮的伴郎會由親細佬擔任,還笑說很多球圈朋友都要練波,因此「費事阻住人」,只有幾位好友,如陳偉豪及陳肇麒,會齊齊為他做兄弟。

於香港飛馬擔任行政、溝通工作已有一段時間,但Peter今次都仲係畀準備婚事考起:「好多嘢都要安排,而且好急,所以都好辛苦。最難搞就係同女朋友溝通,揀婚紗、揀相、排位等等咩都拗,不過我好聽話,都係畀佢鬧多。唔好再鬧我啦Alice,好辛苦呀我。Alice你真係好正、好靚,冇咩要彈你,你咩都識,我就咩都唔識,希望你體諒我,我愛你Alice!」咁Sweet,相信準文太聽到,一定冧到爆啦!


本文来源:http://hk.on.cc/hk/bkn/cnt/sport/20171024/bkn-20171024001224748-1024_00882_001.html

Tag:
本文鏈接:http://www.packagehk.com/30938.html