首頁 » » 巡場男:「重九」靚相呃Like 精選攝影器材

巡場男:「重九」靚相呃Like 精選攝影器材

作者:catherine 發表日期:10 分類:

今日正值「重九」重陽節,傳統都會去登高,行山郊遊最重要的任務唔係行到幾高幾遠,而係影到幾多靚相,所以巡場男今次就走訪到深水埗一帶,搜羅抵玩攝影器材畀大家,有單反、Action Cam、即影即有,靚相呃Like應該唔使我教。

Canon EOS M100 買相機送快卡
去行山個個都想輕裝上陣,要輕便又有質素的相機,非無反相機莫屬,而近期新到的Canon EOS M100淨機只有266g,而且買套裝仲送你SanDisk Extreme Pro 64GB SD高速記憶卡。EOS M100內置2,420萬像素CMOS及DIGIC 7影像處理器,並配備3吋180度上翻式屏幕,並支援美肌自拍功能,讓各位隨時影靚相;加上內建多種針對新手而設計的智能拍攝模式,例如Creative Assist簡易模式會透過顯淺易懂的文字,引導用家拍攝,入門用家都可以好快上手。

Nikon D850 潮玩8K縮時攝影
假如大家自問好好體力,影相又追求質素的話,近期推出的Nikon D850全片幅單反相機都係個唔錯選擇,皆因佢夠晒全能,唔單只影到4,570萬超高像素影像,具備每秒9張連拍,感光度亦可擴展至最高Hi 2(ISO 102,400),影日落、夜景就大派用場,另一賣點是支援直出4K縮時攝影,以及高質素的8K縮時攝影功能,適合帶上山由朝拍到晚,再由晚拍到朝啦。此外,D850背面配備上下翻揭式屏幕,更具有觸控功能,影相拍片都可以靠篤芒對焦。

GoPro Hero5 Black 抵玩語音控制
話說GoPro早前就發布了最新GoPro Hero6 Black運動攝錄機,索價差唔多要成三千尾,咁上代Hero5 Black自然大幅劈價,現金價二千六都唔使,真係超抵玩。事實上,Hero5 Black規格和功能都已經好勁,支援4K@30fps拍片和1,200萬像素影相,而且毋須加殼,裸機下都可做到10米防水效能,即使遇上驟雨都冇問題。另外亦都具備語音控制功能,支援英文、日文、普通話等多國語言,無需要按任何按鍵,用把口就拍到片,行山時就能夠騰出雙手。

ThiEYE T5 平玩4K Action Cam
若嫌GoPro太貴超出預算,平玩Action Cam都有好多選擇,就好似ThiEYE T5就備有4K@30p拍片,而且可以玩埋1080@120p慢鏡拍攝,至於保護殼支援防水、防塵、防震效能,上山下海都冇問題。T5配備170度超廣角鏡頭,適合上到山攝錄廣闊的風景,更配有內建EIS電子防震系統,能夠修正輕微搖晃,令畫面保持穩定,另支援Wi-Fi功能,可配對《ThiEYE HD》手機App控制,畀各位即時把影像擺上網分享。

Polaroid Snap 即影即印
提到即影即有必定會諗到Polaroid(寶麗來),而Polaroid Snap就以玩味行先,細細部適合帶上山影相,不過佢就唔係用傳統寶麗來相紙,而係改以2×3吋Zink相紙作無墨打印,最重要係做緊特價,九百有找。Polaroid Snap唔單止玩到即影即印,,整個過程約需20秒,可將1,000萬像素影像儲存至microSD記憶卡,就算用晒相紙,都可充當一般數碼相機使用。另外佢設計簡約易用,機頂設有彈出式光學觀景器,按一下即會彈出兼開機,更內置彩色、黑白和懷舊3種拍攝風格,甚至可加入寶麗來的經典相框。


本文来源:http://hk.on.cc/hk/bkn/cnt/lifestyle/20171028/bkn-20171028154352617-1028_00982_001.html

Tag:
本文鏈接:http://www.packagehk.com/31416.html