首頁 » » 政Whats噏:朱凱廸被爆議辦瞓覺 險釀流會

政Whats噏:朱凱廸被爆議辦瞓覺 險釀流會

作者:h 發表日期:h 分類:

立法會流會已經見怪不怪,近日更有蔓延至事務委員會嘅跡象,繼上周一(2月26日)民政事務委員會多名委員遊埠同病咗搞到流會後,今日(5日)嘅財經事務委員會喺4分鐘之差亦險釀流會,今次到底係乜嘢原因呢?有議員爆料,就話議會陣線朱凱廸喺辦事處瞓覺無落嚟,叫立法會秘書處上去拍門捉人。嘩!竟然掛住見周公都唔開會?

財經事務委員會今日朝早10時召開會議,喺9時55左右,立法會秘書處職員已經開始密密Call議員落嚟會議室,據知曾經打過畀公民黨(公文袋)郭榮鏗同楊岳橋(Alvin)、朱凱廸、獨立建制派何君堯、保險界陳健波、進出口界黃定光同新民黨葉劉淑儀等,喺會議室內嘅議員亦一齊打電話搵人救亡。

陳健波率先由辦事處跑落嚟,但仍欠1人先夠法定人數,及後秘書處聯絡到何君堯答應開會,但至10時09分仍未見人,秘書處只好再打畀Alvin,得知佢已抵港鐵站,而Alvin隨即拔足狂奔返立法會。突然間,金融界陳振英就跑出會議室外,話資訊科技界莫乃光講朱凱廸喺議員辦事處瞓緊覺,叫秘書處上去拍門捉人喎。

其實當下眾人已將希望投放喺Alvin身上,有人更笑稱「叫佢唔好打呔,上咗嚟先」,最後Alvin不負眾望衝會議室成功救亡。何君堯更喺會議開始後近1小時先現身,而朱凱廸回應時就承認尋晚(4日)已經喺辦公室過夜,電話校咗靜音先聽唔到秘書處來電,最後約10時15分抵達會議室開會。其實,朱凱廸喺上任初接到辦公室嘅時候,曾經話過要諗計設計過辦事處裝修,唔知係咪一早已密謀成日喺到留過夜呢?

據了解,一早預告會缺席嘅議員就包括金融服務界張華峰、地產及建造界石禮謙、商界林健鋒、民主黨胡志偉、工程界盧偉國同民建聯周浩鼎,最後周浩鼎都有出席會議。之但係咁都險釀流會,睇嚟班議員唔好咁大安旨意遲到喇!


本文來源:http://hk.on.cc/hk/bkn/cnt/news/20180305/bkn-20180305135425160-0305_00822_001.html

Tag:
本文鏈接:http://www.packagehk.com/88392.html